Thailand lal thlalak hala puh activist man
Thailand lal, King Maha Vajiralongkorn thlalak hal nia puh, anti-goverment activist Chaiamorn Ammy Kaweeiboonpan chu nimin khan police-ten an man.
Kum 32 mi, Chaiamorn hi Pathianni khan activist pali an hrenna, Bangkok tanin kawtah lungawi lohna lantirin Thailand lal thlalak a hal ni a ni. Thailand ramah hian lal leh lal chhungkua sawisel khapna dan khauh tak awmin, he dan hnuaia thiam loh chantirte chu kum 15 thleng lungin tantir theih an ni.
Bangkok police hotu Pakapong Pongpetra chuan Chaiamorn hian lal thlalak a hal ngei tih finfiahna leh mita hmutu an awm a ni tih a sawi a, he thilah hian midang inhnamnawih pawh an awm niin a sawi bawk. Thailand-a sipai thlawp prime minister Prayuth Chan-ocha kaihhruai sorkar leh lal thuneihna sang tak pek duh lohna lantirin ṭhalaite chuan hun rei tak nawrh an lo huaihawt tawh a ni. Lal sawiselna khapna thupek hnuaiah nawrh huaihawt zinga mi 61 chu thubuai siamsak an ni tawh bawk a, an zingah hian an hruaitu pali an tel.