Texas-in mask vuahna thupek hlip

Khawvela Covid-19 hri kai leh thihpui tamna ber ram, US-a state lian ber, Texas Governor chuan an state chhunga hri lengin ziaawm lam a pan avangin pawn chhuahnaa hmai tuamna, face mask hmang vek tura thupek a siam chu a hlip.

Texas bakah state dang- Michigan, Louisiana, leh Mississi­ppistate-te pawhin mask vuah vek tura thupek an siam tawh chu an sut ve leh tawh bawk. Hetih lai President Joe Biden kaihhruai sorkar chuan hri leng laka invenna tur khuahkhirhna te chu siam chhunzawm a la ṭul hle tih an sawi. US Centers for Disease Control and Prevention (CDC) hotu chuan an inthlahdah mai chuan an ramah hri leng thawh lina hi a thlen leh mai a hlauhthawnawm thu a lo sawi tawh bawk. 

US-ah hian tun hnaiah hri kai thar leh thihpui zat hi an tlahniam ṭan hle a, mahse ram dangte nena khaikhin erawh chuan an la sang hle thung. John Hopkins University data-a a lan danin, US-ah Covid-19 hri kai hmuh chhuah tawh hi mi maktaduai 28 chuang ni tawhin, hripui thihpui hi mi 5,16,000 an tling tawh bawk a ni. 

Texas governor Greg Abott chuan Thawhlehni khan thupek thar tichhuakin, hripui leng vanga khuahkhirhna an lo siam tawh zinga a tam ber chu a hlip a ni. Thupek tihchhuah thar hi March 10 aṭanga hman ṭan tur a ni a, pawn chhuahnaa mask vuah tura tihte pawh hlih zingah hian a tel a ni. Hei bakah hian dawr leh sumdawnna hmun chungchanga khuahkhirhna siamte pawh tihtawp a ni tawh dawn a, sumdawnna hmunte chu 100% a hawn phalsak an ni tawh ang. Texas state bikah hian Covid-19 hri thihpui hi mi 43,000 chuang an awm a, hri vanga thi tamna state pathumna a ni.