Hong Kong sorkarin mipuite pawisa sem dawn

Hong Kong sorkar chuan khawpuia cheng nghet puitling chinte hnenah Hong Kong dollar 10,000 (US dollar 1,280) ṭheuh thilpek atan a sem dawn. 

Pawisa sem tur hi Hong Kong-a cheng nghet,  kum 18 tling chinte an ni dawn a, he thilpek dawng thei tur hi mi maktaduai sarih vel an awm a ni. 

Thla eng emaw zat chu politics buaina avangin Hong Kong mipuite nunphung a lo khaihlak phah tawh a, hei bakah tun hnaiah coronavirus, Covid-19 leng vangin harsatna an tawh chhunzawm leh a ni. Hong Kong-ah hian he hri vang hian mi pahnih an thi tawh a, mi 81 in an kai tih finfiah a ni tawh bawk. 

Financial Secretary Paul Chan chuan kuminah Hong Kong economy chuan harsatna a tawk chho nasa hle tih sawiin, ngun taka an ngaihtuah hnuah kum 18 chunglamte hnenah sum lama an harsatnate tihziaawm sakna tur kawng khat atan pawisa sem an tum tih a sawi.