Pakistan PM hlui bail-a chhuah a ni

Pakistan prime minister hlui, kum 61 mi Shahid Khaqan Abbasi chu National Accountability Bureau (NAB) ten nikum July thlaa an man hnuah, Islamabad High Court (IHC) chuan bail-a chhuah a dilna chu a phalsak.

Abbasi hi bail phalsak ni mah se, intiamkanna (surety bond) atan cheng maktaduai 10 dah kham turin court chuan a ti bawk. Abbasi hi petroleum and natural resources minister a nih lai khan, an ramin Qatar aṭanga Liquified Natural Gas (LNG) an lakluh chungchangah dan kalha che leh, an ramin LNG-a national exchequer-a hlawkna an tel tur kiam chhanah puh a ni a, LNG-ah hian tuialhthei lakluhnaa cheng tluklehdingawn eng emaw zat tichingpena puh a ni.  

Court hian Abbasi bail chungchang a ngaihtuah bakah, planning minister hlui Ahsan Iqbal thubuai pawh a ngaihtuah a, ani pawh hi court chuan bail phalna a pe bawk a ni. Iqbal hi Narowal Sports City complex-a pawisa tihchingpenna chungchangah thubuai a nei a ni.

 

Chief Justice Athar Minallah leh Justice Lubna Saleem Pervez-te awmna IHC bench chuan a hran ve vein, Abbasi leh Iqbal thubuai hi a ngaihtuah a, an pahnih hian intiamkanna (surety bond) atan Rs cheng maktaduai 10 dah kham turin court chuan a ti ve ve bawk.

Abbasi hi nikum July thla khan man a ni a, Iqbal hi nikum vek December thla khan man a ni bawk. NAB lam chuan IHC in bail a rem ti mai hi nasa taka sawisel zuiin, IHC thutlukna hi Supreme Court-ah an khin dawn thu NAB chairman, Javed Iqbal chuan a sawi.