Iraq-ah IS firfiak 39 that

Iraq-a Salahudin pro­vince-ah Thawhlehni khan Iraq sipaite'n Islamic State (IS) firfiak 39 an that.

Salahudin-ah hian anti-IS operation an nei a, intelligence hnen aṭanga an thudawn bawhzuiin Counter-Terrorism Service (CTS) commando-te chuan  international coalition aircraft thlawpnain beihpui an thlak a ni. al-Shirqat khaw bula al-Khanogah tlangahte beihpui hi thlakin firfiakte nen hian darkar 10 zet an inkap a ni. 

Thawhṭanni zan aṭang khan firfiakte nen hian an inkap ṭan a, Thawhlehni zing kawl en thlengin an inkap a ni. Hemi chung­changah hian Iraqi Joint Operations Command (JOC) chuan thuchhuah siamin IS thi 39 zingah hian an hruaitute pawh an tel tih an tarlang.

An birukna hmun lian tak tak pahnih an tichhia a, heng hmunte hi ralthuam leh silai mu tam tham tak an dahṭhatna hmun a nih bakah computer leh document eng emaw zat an dahṭhatna hmun a ni bawk.

CTS commando pali chu an hliam bawk a, thi erawh an awm lo a ni. 

Kum 2017-a IS hneh an nih aṭang khan Iraq-ah hian venhimnain hma a sawn hle a, heti chung hian IS hian hmun hrang hrangah pawikhawihna an la thleg fo avangin Iraq sipai lam hian beihpui an thlak chhunzawm reng tho a ni.