Britain PM-in Brexit vote lak hun sawn hla

Britain Prime Minister Theresa May-i chuan Brexit deal chungchanga British MP-te vote lak hun tur chu March 12-ah a sawn hla. 

Pathianni-a European Union (EU)-Arab League (AL) summit hmang tura a kal dawna chanchinbu mite a kawmnaah, May-i chuan Brexit deal hi tun karah House of Commons-ah ngaihtuah a ni dawn lo tih a sawi.

May-i chuan Thawhlehni-ah Brussels-ah an kal dawn a, hei vang hian Parliament-ah vote lak tur hi an pharh hman dawn lo tih sawiin, March 12-ah erawh vote lak ngei tura buatsaih hman an tum tih a sawi. Hemi rual hian March 29-a EU aṭanga Britain inlakchhuah tum chu kaltlangpui ngei an tum tih a sawi bawk. 

Eptu lam chuan tunkar chhung hian EU aṭanga inlakchhuahna tur inremna siam, Brexit deal vote lak tum chu tihkhawtlai an lo tum tawh a, mahse hemi hma hian PM chuan vote lak hun tur hi a sawn ta zawk a ni. Labour Party-a Brexit spokesman Keir Starmer chuan May-in vote lak hun a tikhawtlai chu sawiselin, hei hi a thil tuma a hlawhchhamzia tichiangtu a ni, a ti. 

EU-AL summit-ah hian Brexit chungchang hi sawi tura telh a ni lo a, mahse May-i chuan EU hruaitute chu hmuh a, Withdrawal agreement an lo siam tawh thlak danglam a tum dante sawipui a tum a ni. May-i hian European council president Donald Tusk bakah Germany Chancellor Angela Merkel-i te meeting a neihpui dawn bawk.  

Brexit deal duh loh vang hian British MP 11, rorellai Conservative pathum leh eptu party lian ber, Labour Party MP pasarih-te chuan an party chhuahsanin, House of Commons-ah hian Independent Group an siam a ni.