Trump-Kim summit atan Hanoi inpeih

Vietnam khawpui, Hanoi chu US President Donald Trump leh North Korea hotu Kim Jong-un te summit vawi hnihna thleng turin an inpeih tawh niin Vietnam  official-te chuan an sawi. 

Ni hnih awh tur Trump-Kim summit hi February 27 leh 28 hian neih a ni dawn a, hemi atan hian Hanoi khawpuiah pawh venhimna tihkhauh a ni. 

Vietnam Ministry of Culture-a deputy director Phuong Hoa Nguyen chuan khawvelin summit neih tur hi a ngaihven avangin ram hrang hrang aṭangin media mi pawh an kal nasa dawn hle tih a sawi a, hei hi khawvel hriata an ram culture ropui tak takte lo pholanna remchang tak tur a nih thu a sawi. Vietnam ram chu khualzinte tana hmun mawi leh him a nihzia leh, investment tihna tur ram ṭha a nih tih lantirna remchang tak a ni tih a sawi.

Nikum June thlaa Singapore-a Trump-Kim summit neihna atan khan Singapore chuan dollar maktaduai 14.8 vel a ruahman a, mahse an sum invest aia a let 40 vel zeta tam an lakluh theih phah niin Nguyen chuan a sawi. Tun ṭuma summit an thlen tur hi an ram economy pawhin a hlawk phah ngei an beisei tih a sawi.