Sudan-ah emergency puan duh loin kawng zawh

Suan President Omar al-Bashir-an an ram puma state of emegency a puan chu duh loin Pathianni khan Sudan khawpui, Khartoum leh khawpui lian dangah mi tam takin kawng an zawh. 

President Bashir hian hun rei tak chhung eptute nawrh huaihawt avanga tualchhung buaina thleng ṭhin thunun theih loa a awm hnuin kar kalta Zirtawpni khan kum khat chhung atan emergency a puang a ni. President chuan a cabinet leh provincial government-te a ṭhiat nghal bawk a, an ramin sum leh pai lama harsatna a tawh mek chinfel dan kawng ngaihtuahin mi thiamte puihna a zawn tur thu a sawi.  

Mahse Pathianni khan Khartoum bakah Omdurman leh Madani khuaahte emergency puan duh lohin mipuiten kawng an zawh a, kawngzawhte chuan President Bashir-a kaihhruai sorkar chu paihthlak ngei an tum tih an sawi. Khartoum leh Omdurman-ah chuan riot police-te chuan mipuite pungkhawmte hnawhdarh  nan hian tear gas-te an hmang a, pungkhawmte hian motor ke te an hal bakah kawngpuite an dang bawk. 

Sudan ramah hian nikum December 19 aṭang khan Bashir leh a official-te chu an ram economy dinhmun chhe zelah mawhphurtua puhin lungawi lohna lantir a ni a, nitin deuh thawin kawng zawh an awm a ni. Nawrh huaihawtte leh security force-te intihbuaina avangin mi 51 an thi tawh niin Human Rights Watch chuan a sawi a, an zingah hian naupang pawh an tel.