Mahmoud Abbas ban phutin Gaza-ah nawrh huaihawt

Palestinian Authority (PA) President Mahmoud Abbas-a ban phutin Pathianni khan Gaza Strip-ah Hamas thlawptu Palestinian ten nawrh an huaihawt. 

President Mahmoud Abbas-an Hamas sum dawn tihtlem sak a tum chu duh loin, Hamas thunun Gaza Strip-a public sector hnuaia thawkte chu an hlawh kima pe turin an phut tih mipui pungkhawmte chuan an sawi. Al-Sarya square-a mipui lungawi lo pungkhawmte hian President Abbas chu  bang tura an phut thu sawiin, Israel-in kum tak tam chhung Gaza kalpawhna a dansak chu an duh loh thu an sawi bawk. 

Hetihlai hian Israel chuan Gaza kawng a dansak hi Hamas hoin Israel beihna tura ralthuam an lakluh tur venna atana thil pawimawh a nih thu a sawi thung. 

Pathiannia nawrh huaihawt hi Gaza-a Popular Movement for National Salvation buatsaih a ni a, he pawlah hian Palestinian pawl hrang hrang, Hamas leh Abbas-a eptu pawlte an tel a ni. Mipui pungkhawmte chuan roreltute chhiahhlawh an ni lo tih lantir an tum tih sawiin, inthlanpui buatsaih an phut thu an sawi. Kum 2006 aṭang khan Palestinian territory-ah hian parliament inthlan hi buatsaih a la ni lo a, 2005 aṭang khan president thlan a ni tawh lo bawk. 

Abbas-a pawl, Fattah rorelna West Bank-a Hebron khawpuiah Pathianni vek khan mipuite chuan Abbas thlawpna lantirin kawng an zawh ve bawk. Hebron-a kawngzawhte hian Hamas-te chu Palestine ram ṭhatna tura thawk tura an phut thu an sawi ve thung a ni. 

Kum 83 mi, Abbas-a term hi kum 2009 khan tawp tawh tur a ni a, mahse inthlan buatsaih a nih loh vangin president dinhmun hi a chelh chhunzawm reng a ni. Palestinian pawl pahnih, Fatah leh Hamas-te hian an inkara harsatna awmte chinfel dan kawng zawngin inbiakna nei fo mah se tun thlengin inremna an la siam thei lo.