US House-in Trump-a emergency puan danna resolution pass

US House of Representative chuan President Donald Trump-an US-Mexico ramri hungna bang siam a nih theihna atana national emergency a puan danna resolution chu Thawhlehni khan a pass.

Democratic lam tamna, House-a vote laknaah emergency hnawlna resolution thlawp lamah vote 245 tlain, a thlawp lo lamah vote 182 a tla thung. Vote laknaah hian Trump-a party, Republican party member 13 chuan Democrats bill hi an thlawp a ni. Bill hi Republican tamna, Senate-ah pharh a ni ve leh ang a, Senate-ah pass pawh ni se President Trump chuan a thuneihna hmanga lo hnawl a tum thu a sawi tawh a ni. 

Democrats hruaitute chuan bill hi Trump-an ramri hungna bang a siam tumnan hnawlsak tumna ngawt a ni lo tih sawiin, President-in dan pangngai ang taka Congress kaltlanga a sum hmuh tur a hmuh theih loh avanga an ram Constitution a rahbehna an hnawlna zawk a ni tih an sawi. 

President Trump hian Democrats lamin Mexico ramri hungna bang siamna tura US dollar tluklehdingawn 5 fund pe tur a dilna an remtihpui duh loh avangin chhim lam ramri-ah national emergency a puang a ni. Congress chuan Texas-a Rio Grande Valley-a ramri hungna turin dollar tluklehdingawn 1.4 pekna tur chauh a pass sak a, hei hian bang siamna a huam tel lo bawk a ni. Ramri hungna bang siamna tur chungchanga an inrem theih loh avang hian US sorkar chu ni 35 chhung khar, shutdown a lo nih phah tawh bawk. 

National emergency a puan hmang hian Trump chuan Mexico ramri hungna bang siamna tur hi fund dang aṭangin a pawtpeng thei dawn a ni. Hei hi Democrats lam chuan nasa taka sawiselin, an ram economy thlengin a nghawng pawi thei dawn niin an sawi. House Speaker Nancy Pelosi chuan Trump chuan emergency hmang hian ramri bang siamna turin military construction project sum tam tham tak a ruksak dawn niin a sawi.