Vietnam-ah Trump-Kim summit ṭan

US President Donald Trump leh North Korea hotu Kim Jong-un-te chuan nimin tlai khan Vietnam khawpui, Hanoi-ah ni hnih awh tur summit an nei ṭan a, zanriah an kil dun zui nghal bawk. 

Hruaitu pahnihte hian nimin  kha an meeting vawi khatna chu Sofitel Legend Metropole-ah neiin, minute 20 chung chauh an inkawm a, hemi hnu hian an ṭhuihruaite nen zanriah an kilho nghal a ni. Vawiin hian meeting eng emaw zat an neih chhunzawm leh dawn a, mahse an thu ngaihtuah turte erawh sawichian a ni lo a, mahse nikuma Singapore-a summit an neih ṭuma an lo sawidun tawh, Korean Peninsula aṭanga nuclear ralthuam tihbo chungchang chu an thupui ber tura ngaih a ni. Vawiin hian joint press conference an neih beisei a ni bawk. 

Nimina Kim nena an inhmuh hma hian President Trump chuan Vietnam President leh Communist Party secretary-general, Nguyen Phu Trong a hmu hmasa a, ram pahnih airlines-ten thawhdunna tur inremna eng emaw zat ziah chu an enpui bawk. US aircraft manfucaturer Boeing chuan VietJet leh Bamboo Airways chu inremna a siampui a, US-a aviation technology company Sabre leh Vietnam Airlines pawhin inremna an ziak bawk a ni. Trump hian Vietnam Prime Minister Nguyen Xuan Phuc pawh a kawm bawk. 

Kim pawhin Hanoi-a North Korean embassy a tlawh a, a farnu Kim Yo Jong-in a ṭawiawm a ni. Kim hi summit zawh hnu, Inrinni-ah pawh Vietnam-ah a la cham khawmuang dawn a ni.  

Vietnam sorkar chuan an rama hruaitu pawimawh tak pahihten summit an neih hriatrengna pualin special postage stamp a tichhuak. Vice minister for information Pham Hong Hai chuan postage stamp siamthar hi a tlangzarh.