Sudan buaina: Sipai-te'n inthlan sawn hma dawn

Sudan sipai hruaitute chuan eptu pawlte nena inremna an siam tawh sa zawng zawngte chu bawhchhiain, thla kaw chhungin inthlanna an buatsaih dawn tih an sawi.

Thawhṭanni khan Sudan khawpui Khartoum-ah nawrh huaihawtte leh security force-te inkarah buaina a chhuak a, security force-te hian silai hmet puakin, buaina chhuakah hian mi 30 vel an thi nia tarlan a ni.

Hemi hnu hian sipaite hian sawisel an hlawh nasa hle a, US pawhin Thawhṭannia thil thleng chu inbeihna rapthlak tak a nih thu a sawi hial. Hemi hnu hian sipaite hian thuchhuah siamin inthlan hun an sawnhma dawn tih an tarlang.

Sudan ramah hian fuel man leh eitur man a san avanga buaina nasa taka chhuah hnuah President ni lai Omar al-Bashir chu April 11 khan paihnthlak a ni a, sipai sorkar a ding zui a ni. Mahse civil mite chuan civil sorkar siam phutin inthlan buatsaih turin sipaite chu nasa takin an nawr a, kum thum hnua inthlan buatsaih turin inremna an siam a ni.

Sipai sorkarna siamtu Transitional Military Council (TMC) te leh nawrh huaihawttute hian inrelbawlna kalpui dan turah inremnate pawh an siam tawh bawk. Sipai-te hian  nawrh huaihawttu, pro-democra­cy movement hruaituin TMC nena an inbiakna zawng zawng an tihtawp thu leh general strike a puan hnuah inthlan ṭhat buatsaih a nih tur thu hi an puang zui ve leh ta a ni.