Donald Trump leh British PM May-i ten inbiakna an nei
Ni thum chama UK tlawha zin, US President Donald Trump chuan nimin khan UK a chhuahsan ta.
Donald Trump hian Thawhṭanni khan London hi a thleng a, tlaiah Queen Elizabeth chuan ruaipui a buatsaih sak a ni. Thawhlehni khan British Prime Minister Theresa May-i nen meeting hlawhtling tak an nei zui.
Hemi ni vek hian Brexit Party leader Nigel Farage pawh a hmu bawk. Farage hian a Twitter-ah meeting ṭha tak an neih thu leh Trump chu Brexit-a beiseina neitu a nih thu a tarlang. Trump hian nimin khan Ireland a tlawh leh nghal a, hemi hnu hian US lam a pan zui a ni.
Khawvelin a hriat tawha thawhdunna ropui ber
US President Donald Trump chuan US leh UK thawhdunna chu, "Khawvelin a hriat tawha thawhdunna ropui ber," tiin a sawi mauh mai.
Theresa May-i nen meeting an neih zawha news conference an neihah, Trump chuan UK-in European Union an chhuahsan hunah insumdawn tawnna kawngah inremna ṭha tak an siam dawn tih a sawi.
Trump chuan May-i chu fakin Brexit chungchangah hna ṭha tak a thawk tih a sawi a, amah ai pawhin midang dawr kawngah a ṭha zawk tih a sawi bawk. Brexit chu a thleng ngei dawn tih sawiin, a thlen chhan tur chu UK chu ram ropui tak leh mahnia nihphung neih duh ram an nih vang tih a sawi a ni.
Ram pahnihte hi Huawei chungchangah erawh an ngaihdan a inang lo thung a, Iran chungchang pawh sawi dunin, Iran chuan nuclear ralthuam a siamchhuah tawh lohna turin leh firfiakte a thlawpna a tihtawpna tura hmalak dun an tum tih an sawi.