China President-in Russia a tlawh

China President Xi Jinping chuan Nilaini khan ni thum cham turin Russia a pan a, Russia President Vladimir Putin nen inbiakna an nei. 

Xi Jingping hian Vladimir Putin hi insumdawn tawnna chungchang leh ram pahnih inlaichinna chungchang a sawipui a, vawiin hian Russia hi a chhuahsan leh ang. Xi Jinping hian Russia President Vladimir Putin chu a ṭhianṭha ber a nih thu a sawi a, kum ruk chhungin ṭum 30 vel an inhmu tih a sawi. Russia chu a ram tlawh ngun ber zinga mi a nih thu a sawi bawk. 

Ram pahnih hruaitu lute hian insumdawn tawnna turin inremna eng emaw zat an ziak a, Xi Jinping hian Moscow sahuan-a dah tur panda pahnih a pe bawk. China president chuan ram pahnihte chu politics-ah an inring tawn tih sawiin, kawng hrang hrangah an inthlawp tawn nasa hle tih a sawi.

Kum nga kaltaa Ukraine buaina avang khan Russia leh khawthlang lam ramte inkar a ṭha lo hle a, hemi hnu hian China nena an inkar hi a ṭha chho hle thung a ni. Ram pahnih hruaitute hian hun lokal lehzel turah sipai thuam chakna kawngah leh economic hmasawnna tura thawhdun an remti bawk a ni.

President Putin pawhin ram pahnihin inlaichinna ṭha tak an nei chu lawmawm a tih thu a sawi ve bawk a, panda pek an ni pawh chu lawmawm a tih thu a sawi bawk.