Conservative Party leader Theresa May a bang

British Prime Minister a nihna aṭanga bang Theresa May chu nimin khan an party, Conservative Party leader a nihna aṭangin official-in a bang leh ta. Theresa May hi amah thlaktu tur thlan a nih hma chuan Prime Minister a la nih chhunzawm dawn a, an party leader tur thlan fel hma chu leader a la ni zui bawk ang. 

Kum 62 mi Theresa May hian kar hnih liam taah khan Brexit a hlawhtlinpui theih loh avangin a ban thu hi a lo puang tawh a, mahse official tak chuan nimin khan a bang chauh a ni. Conservative Party leader leh Prime Minister dinhmun luah tur hian Conservative MP panga chuan an chuh nghal a ni. June 10, Thawhṭanni hian nomination thehluhna hun hawn a ni dawn a, zing dar 10 aṭanga tlai dar 5 thleng hun hawn a ni ang. 

A tira inremna an siam ang chuan kal se March 29 khan UK hian European Union an chhuahsan tawh tur a ni a, mahse May-i MP-te hian Brexit deal an pawm theih loh avangin April 12-a chhuahsan turin thutlukna an siam. Heti chung hian an deal siam chu an la pawm theih chuan loh avangin October 31-a chhuahsan turin thutlukna dang an siam leh ta a ni.

Theresa May chuan Brexit deal siam chungchangah a MP-te thlawpna hmu turin a theihtawp a chhuah tih sawiin, tunah chuan Prime Minister tharin Brexit chu a kalpui ve a hun tawh a ni, a ti. May-i Brexit deal siam hi an party MP ṭhenkhat ngei pawhin ṭha tawk loa ngaiin an thlawp thei lo a ni.