African Union-in an member aṭangin Sudan an suspend

Thawhṭanni-a Sudan-a nawrh huaihawt mi eng emaw zat kahhlum an nih avangin African Union (AU) chuan an member ram nihna aṭangin Sudan an suspend.

AU-a Peace and Security Department chuan AU thiltiha Sudan tel vena zawng zawng chu tihtawp lailawk a ni tih an sawi a, civil mite kaihhruai thuneitu siam an nih hma loh chuan Sudan suspend-na hi an titawp dawn lo tih a sawi. 

AU chuan civil mite thlan­chhuah sorkar din chu buaina tihrehna awmchhun a nih thu an sawi bawk. 

Thawṭanni khan Sudan ram khawpui Khartoum-a nawrh huihawtte leh security force-te inkarah buaina a chhuak a, security force-te hian mi eng emaw zat an kaphlum a ni. Hei vang hian Ethiopia-a Addis Ababa-ah AU emergency meeting koh a ni a, hetah hian Sudan suspend tur hian thutlukna an siam ta a ni.

Central Committee of Sudanese Doctors (CCSD) chuan Thawhṭannia buaina chhuakah hian mi 108 thah an ni a, mi 500 velin hliam an tuar tih an sawi laiin, Sudan health ministry chuan mi 61 an thi tih an sawi thung. Sudan-ah hian fuel leh eitur man san vangin nikum December thla aṭang khan nawrh huaihawt ṭan a ni a, hemi kaihhnawihah hian buaina chhuah chhunzawm zelin kumin April 11 khan Sipaite chuan president Omar al-Bashir an paihthla a ni. Mahse hemi hnu pawh hian mipuite chuan nawrh chu an la chhunzawm zel a, civil sorkar din an phut a ni.