Myanmar : Nawrh huaihawt zinga mi 50 chuang thi tawh Nilaini-a police-te silai hmehpuahah mi 38 an thi

Myanmar sipai rorelna duh lohna lantirin mipuiten nawrh an huaihawt chhunzawm zel a, security force-te silai hmehpuahah an zinga mi 50 chuang an thi tawh.

Nilaini khan police leh sipaite silai hmehpuah avangin mi 38 an thi a, nawrh huaihawt hnua ni khata thi an tam ber ni a ni. Security force-te hian mipui pungkhawmte hnawhdarh nan hian warning pawh pe lawk loin silai hi an hmetpuak niin mita hmutute chuan an sawi. 

Myanmar-a UN palai, Christine Schraner Burgener-i chuan Nilainia thil thleng chu a rapthlakin a ṭhawng hle tih a sawi a, sipaiten civil sorkar thuneihna an hnehchhuh avanga lungawi lohna lantir zinga mi 50 chuang an thi tawh a, hliam tuar mi tam tak an awm bawk tih a sawi a ni. Save the Children chuan nawrh hauihawtnaa thi zingah hian naupang pali an tel tih a sawi bawk. 

Burgener-i chuan Nilainia thil thleng video footage hrang hrang chu weapon expert-ten endikin, police-ten mipui pungkhawm lam hawia silai an hmehpuah hi 9mm sub-machine gun a ni tih a sawi. February 1-a sipaiten thuneihna an hnehchhuh hnuah mi 1,200 vel man a ni tawh a, an mi man chhungte tam tak chuan an chanchin an hriat zui tawh lo thu UN palai chuan a sawi. "Hetianga thil thleng hi eng chen nge kan thlir reng dawn? He boruak ṭha lo tak titawp tur hian a theih dan ang anga kan beih a ṭul a ni. Ram hrang hrangte kan inthurual a, mipui dikna humhim sak tura kan chet a ngai tawh a ni," tiin UN member tin ramte chu hma la turin a sawm.

US chuan nawrh huaihawtte chunga sipaite chetdan chu a dem thu sawiin, sipaite laka action na zawk lak a ṭul thu a sawi. 

State department thupuangtu Ned Price chuan Myanmar hming hmasa hmangin, "Burma ram mipuiten civil sorkar din leh phuta nawrh an huaihawtnaa tharum thawhna leh rawng taka chetna thleng hi kan dem tak zet a ni," tiin, Burma sipaite chet dan ena ram hrang hrangten aw an chhuah a ṭul tih a sawi a ni.

Myanmar rama thil thlen dan : 

February 1 : Myanmar Parliament session hmasa ber neih hma lawkin, zingah sipaiten State Counsellor Aung San Suu Kyi, president Win Myint leh rorellai Natioal League for Democracy (NLD) hruaitu eng emaw zat an man. Sorkar thuneihna chu sipai hotu, senior general Min Aung Hlaing kutah hlan nghal vek a ni. 

February 2 : Yangon khawpuiah mipuiten sipaite chet dan duh lohna an lantir nghal a, doctor leh zirlai  pawlte chuan civil disobedience campaign neih turin mipuite an sawm nghal. 

February  3 : Hospital 70 leh medical department staff-te chuan lungawi lohna lantirin an hna an chawl. Hnaa kalte pawhin civil disobedience campaign zawmna lantirin ribbon sen an vuah. Myanmar police-ten Suu Kyi-i chu dan loa ram dang aṭanga walkie-talkie radio lalut leh phalna nei loa kawlah puhin thubuai an siamsak a, February 15 thleng kawl an dil. President Win Myint pawh coronavirus hri leng darh tur venna atana dan siamte bawhchhiaa puhin thubuai siamsak a ni bawk.

Sipaiten ram chhunga boruak ṭha a awm theihna atan tiin Facebook, Messenger leh WhatsApp service an block. 

February  4 :  United Nations Security Council chuan Suu Kyi leh midang mante chu chhuah turin sipaite an phut a, mahse sorkar thuneihna hnehchhuh a nih chungchanga demna thu erawh an la sawi lang tel lo. 

February 5 : Zirtirtu leh sorkar hnathawk tam takin Civil Disobedience Movement an zawm a, mipuite thlan civil sorkar a din leh hma chuan sipaite tana hna thawh an tum lo tih an sawi. Japan beverage group, Kiran chuan Myanmar Economic Holdings (MEHL) a thawhpuina a titawp. 

February 6 : Sipaiten an ram chhungah Twitter leh Instagram hman theih lohin an block. 

February 7 : Internet service tihnun leh a ni a, social media platform-te erawh block an la ni. 

February 8 : Yangon, Mandalay leh khawpui lian dangah curfew puan a ni a, mi panga aia tam punkhawm khawp a ni bawk. Sipai hotu Min Aung Hlaing chuan a vawi khatna atan TV-ah thu sawiin, kum khat chhunga inthlan buatsaih a tiam a, hnehna changtu hnenah thuneihna hi pek a ni ang, a ti. 

February 9 : Nay Pyi Daw-a nawrh huaihawt lam hawia police-ten silai an hmehpuahah hmeichhia pakhat a luah kap fuhin, hliam na tak a tuar. 

February 11 : US-in Myanmar acting president leh sipai hotu ṭhenkhatte hrekna a siam.

Ferbuary 12 : Police-te rubber bullet kah avangin nawrh huaihawt zinga pathumin hliam an tuar. UN Human Rights Council chuan Suu Kyi leh midang hren mekte chhuah turin a phut. 

February 15 : Khawpui lianahte armourd vehicle dah luh a ni a, judge-in Suu Kyi kawl theih hun chu kar hnih dang a pawtsei. 

February 18 : UK leh Canada-in Myanmar sipai hotute hrekna an siam. 

February 19 : Nay Pyi Daw-a nawrh huaihawtnaa kah fuh, Mya Thwate Thwate Khaing chu a hliam tuar loin a thi. 

February 22 : US-in general dang pahnih hrekna a siam leh a, EU pawhin Myanmar sipai hrekna a puang. 

February 25 : Facebook-in Myanmar sipai leh a kaihhnawihten an platform an hman a khap.  Sipai thlawptu mi eng emaw zatin Yangon-ah kawng zawhin, nawrh hauihawtte an bei. 

February 27 : Police silai hmehpuahah mi pakhatin hliam a tuar a, mi eng emaw zawt man an ni. 

February 28 : UN human rights office chuan nawrh huaihawt zinga 18 chu police-te silai hmehpuah vangin an thi tih a sawi. 

March 1 : Court-ah Suu Kyi a inlan a, thubuai dang pahnih siam sak leh a ni. 

March 2 : ASEAN foreign minister-ten Myanmar sipaite an kawm. 

March 3 : Security force-te silai hmehpuaha nawrh huaihawt zinga mi 38 an thi.