China-in defence budget USD tld 209-ah a tipung

China chuan kum 2021-22 atana a defence budget-ah US dollar tluklehdingawn 209 dahin, kum ruk chhung a zawnin defence budget hi a tipung tawh a, kum hmasa aia a punna hi 6.8% a ni. 

Nimin khan China Parliament, National People's Congress annual session chu ṭan niin, premier Li Keqiang chuan defence tana sum hman tur dah zat hi a puang a, USD tld 200 a tlin ṭum khatna a ni. China-in defence tana sum a dah hi US defence budget, USD tld 740.5 hmun lia ṭhena hmun khat aia tam deuh a ni a, hetih lai hian India defence budget aiin a let thumin a tam thung. Nikum khan China hian defence budget atan USD tld 196.44 a dah. 

Premier Li chuan nikum chhunga an hnathawh hrang hrang leh, kum 2021 atana hmachhawp an neihte report-in, kum 2020-ah an ram sipaiten hlawhtlinna lian tak an neih thu a sawi. "Defence leh armed force lamah nikum khan hlawhtlinna lian tak kan nei a, kan sipaite chuan ram leh mipuite venghim turin theihtawp an chhuah a, hei bakah hian hri darh tur venna kawngah pawh an thawk bawk a ni," a ti. 

Li chuan PLA high command, Central Military Commission (CMCO) hotu President Xi Jinping-a'n armed forces leh military strategry thuamchakna tura hmathlir a lo neihte chu a taka an kalpui tur thu a sawi. Science, technology leh industry kaihhnawihah People''s Liberation Army-te thuam chakna turin ruahmanna an siam dawn a, defence mobilisation system pawh tihlen zel an tum tih Li chuan a sawi. PLA hian kuminah sipaite hlawh chu 40% a tihpun a nih tur thu a lo puang tawh bawk a ni. 

NPC thupuangtu Zhang Yesui chuan China-in defence lama thuam chak a tumna chu ram dang vau leh bitum a tumna a ni lo tih a sawi nghal. China chuan boruak muanawm tak hnuaia hmasawnna kalpui a duh a, mahni invenna lam hawi defence policy zawk chu a zawm tlat a ni, a ti. 

Premier Li chuan kum 2021 atana annual economic growth rate chu 6% chung lam ni tura chhut a ni thu a sawi bawk. Nikuma hripui lengin ram economy nasa tak a nghawng avang khan, China chuan hun rei tak chhunga a ṭum khatna atan  gross domestic product (GDP) growth rate tura a beisei hi a puangzar lawk lo a ni. Mahse kuminah erawh chuan 6% chung lam a tlin a beisei thu Li chuan a sawi.