Iraq-ah Pope Francis a zin

Roman Catholic kohhran hotu, Pope Francis chu ni li cham turin nimin khan Iran-ah a zin. 

Pope Francis hi kum 84 mi a ni tawh a, pope ni tawh zingah Iraq tlawh hmasa ber a ni. Nimin zing khan Rome-a Leonardo da Vinci airport aṭangin Iraq khawpui, Baghdad a pan. Pope lo hmuah nan hian Baghdad airport pawnah chuan Iraq leh Vatican flag an lo zar a ni. 

Iraq sorkar chuan an rama Pope a cham chhungin venhim hna thawk turin security force mi leh sa ṭhahnem tham tak a dah belh. Tun hnaiah Baghdad khawpuiah hian pawikhawihna a thleng fo a, Nilaini zing pawh khan ṭangrual sipai leh Iraq sipaite awmna airbase chu rocket 10 hmangin kah a ni. 

Iraq-a ni li a cham chhung hian hmar leh chhim lama khawpui pali a tlawh ang. Baghdad church-ah Mass buatsaihin, he hmun hi kum 2010-a Islam firfiakten an inkhawm lai an beih ṭuma mi 50 chuang an thihna hmun kha a ni. 

Chhim lam khawpui Najaf-ah Shiite Muslim hruaitu kum 90 mi, Grand Ayatollah Ali al-Sistania a kawm ang. Islamic State (IS) firfiak pawlin an thunun ṭhin, Mosul khua pawh Pope hian a tlawh dawn bawk. Prophet Abraham-a pianna, Ur khua pawh a tlawh bawk ang. 

Pope zin tur hi Shiite Muslim pawl ṭhenkhat chuan an dodal hle thung a, Iraq inrelbawlnaa khawthlang ramte inrawlh tumna hmanrua niin an sawi. Mahse Iraq mipui tam zawk erawh chuan a ṭum khatna atana Pope in an ram a tlawh hi an lo lawm hle thung. 

Pope Francis hi Italy ram pawna a zinchhuah ṭum 33-na a ni.