US-ah Covid vaccine dose mtd 85 chuang pechhuak tawh
Khawvela Covid-19 hri kai tamna ber leh he hri vanga thi tamna ber United States-ah chuan hri kai thar rate a tlahniam chho mek a, Covid-19 vaccine dose maktaduai 114 chuang semchhuah a ni tawh bawk.
Kumin January thla tir lam aṭang khan US-ah hian hri kai thar hi an tlahniam ṭan a ni. Nikum December thla aṭang khan US-ah hian Covid-19 vaccine semchhuah ṭan niin, health worker-te leh nursing home staff-te pek hmasak an ni a, kar liam ta Zirtawpni thleng khan dose maktaduai 114 chuang semchhuah a ni.
Hri kai thar punna hi tlahniam mah se hri kai hi an la awm reng tho a, kumin January 11 aṭanga a chhiara ni 43 chhung chu hri kai thar punna chu tlahniamin, hemi hnu hian hri kai thar an pung leh hlek a, kar liam ta Zirtawpni khan US Centers for Disease Control and Prevention (CDC) chuan hri kai thar mi 66,481 an awm thu leh he hri vanga thi hi mi 1,840 an awm thu a tarlang.
Hri kai thar an awm chhoh leh chhan ber nia sawi chu, kumin kum tir aṭanga hri lengin ziaawm lam a pan avanga hmaituamna hmang lo an tam chhoh ṭan vang niin media ṭhenkhatte chuan an tarlang. Worldometer tarlan danin nimin thlenga US-a hri kai awm tawh zawng zawng hi mi 2,96,53,891 an ni a, he hri vanga thi hi mi 537,119 niin, enkawl dam hi mi 2,02,73,915 an awm tawh bawk.
California-ah B.1.427/B.1.429
University of California, San Francisco-a researcher-te chuan nikum December thla khan Covid-19 hri dang chi B.1.427/B.1.429 tih hi an hmuchhuak a, Kar liam ta Ningani khan he hri kai thar hi US-ah mi 2,672 hmuhchhuah an awm.
Senate-in Covid-19 relief package US dollar trillion 1.9 a pawm
US president Joe Biden Covid-19 relief package siam US dollar trillion 1.9 chu February thla tawp khan House of Representatives-in a pawm hnuah, Senate chuan kar liam ta Inrinni khan an pawm ve leh.
Senate-ah hian he package hi a duh lamah vote 50 a tla a, duh lo lamah vote 49 a tla thung a ni. He package lian tham tak hi Covid-19 vanga harsatna tawk sumdawng te khaichhuah nan te, tualchhung sorkar puih nan te, hri leng vanga chhungkaw harsatna tawk te, vaccine leina atan te leh damdawi ṭul danga hman tura tih a ni.