Hong Kong-ah bill duh lohna lantir zel

Hong Kong-a bill duh lohna lantira nawrh huaihawtte chuan nawrh an la chhunzawm zel a, nimin khan parliament lam pana kawng an zawh chu police-te nen nasa takin an innek buai.

Police-te hian pepper spray leh tiang hmangin mipui hnawhdarh an tum a, mahse mipuite hian lo bei letin brick-ten an vawm a ni. Sorkar building panna kawngpui pawimawh an dang bawk. Mipuiten nasa taka an dodal bill hi Hong Kong sorkar chuan kaltlangpui a la tum tho a, June 20 hian hemi chungchangah hian a tawp nan vote an la leh ang. Mahse buaina a chhuah tak avang hian Legislative Council (LegCo) chuan bill chungchanga meeting vawi hnihna nimina neih tura an lo ruahman tawh chu an tikhawltlai a, hun remchang danga neih turin an sawn.

Nimina nawrh huaihawtnaah khan mipui sang tam tak an pungkhawm leh a, kum lama naupang zawkte leh zirlaite an ni tlangpui a, hmaikawrte an vuah hlawm a ni. Hong Kong Police Force-te chuan nawrh huaihawtte khawsak dan chu a nasa hle tih sawiin, ralmuang takin nawrh an huaihawt lo tih an tarlang.

Political party Hong Kong National Front chuan, "Sorkarin bill an hnukdawk a nih loh chuan tiam chin awm loin nawrh kan huaihawt dawn a ni," an lo ti ve mek bawk. Sorkarin bill put luh a tum hi dodalna a nasa hle a, 1997-a British-in China sorkar hnena Hong Kong a peklet hnua nawrh huaihawtna lian ber a chhuah phah hial a, Hong Kong Chief Executive Carrie Lam leh justice department member dangte pawhin vau an tawk hial. Police-te chuan vauna dawn chungchang hi an chhui chiang mek tih an sawi. 

Hong Kong mipuiten nasa taka an dodal bill hi a hming tarlan a la ni chiah lo a, khawtlang media-te chuan 'bill danglam tak' tiin an sawi mai thung.

He bill hi pawm a nih chuan Hong Kong-a thilsual titu nia hriatte chu China, Taiwan leh Macau-ahte an thubuai ngaihtuah tura thawn theih an ni dawn a ni. Pawikhawihna hian tualthah leh pawngsual thubuai a kawk bik deuh nia sawi a ni bawk. 

February thlaah khan Hong Kong khua leh tui, kum 19 mi chu Taiwan-a chawlh hmanga an kalnaah a bialnu rai lai thata puh a ni a, hemi hnu hian Hong Kong-ah a tlanchhe zui a ni. Hei vang hian Taiwan chuan a thubuai hi an ngaihtuah chhunzawm thei lo a, hei hian bill thar hi a hring chhuak ta a ni. 

Hong Kong hi China ramchhunga awm ni mah se, 'one country, two systems' principle hnuai­ah dan leh thupek hrang nei a ni a, legislature leh economic system hrang an nei bawk. Hei bakah hian Hong Kong dollar an nei hrang  a, Human rights leh China hmundanga miten an neih loh zalenna an nei bawk.

Bill hmang hian heng danglamna tam tak an neihte hi a bo tial tial an hlau a, Beijing thuneihna hnuaia an tluk luh an hlauh avangin bill hi an dodal a ni.