Dan loa US-a pem lut danna atan Mexico-in President thlawhtheihna hralh dawn
Mexico chuan ramri aṭanga dan loa US-a pem lut ṭhinte danna turin President thlawhtheihna a hralh dawn tih a sawi.
Mexican President Andres Manuel Lopez Obrador chuan thlawhtheihna an hralh aṭanga hlawkna an hmuhte chu US-a dan loa pem luh tumte danna atan hman a ni dawn tih a sawi. President Manuel Lopez Obrador hian campaign dawna a auhlaah president thlawhtheihna chu mi rethei zawkte chhawmdawlna atan a hralh dawn tih a lo sawi tawh a ni.
President chuan a thlawhtheihna Boeing 787 Dreamliner chu US dollar maktaduai 150 man a ni tih a sawi a, he thlawhtheihna hi US dollar 218-a lei a ni thung. He thlawhtheihna hi zawrhlai mek a ni hrim hrim a, California warehouse-ah dah mek a ni. Mexico sorkar hian sorkar thlawhtheihna 60 leh helicopter 70 hralh a tum bawk.
US hian Mexico bungruaa chhiah a lak chu 5%-a tihpun a tum avangin Mexico hian US hi inbiakna a neihpui a, kar hmasa khan inremna an siam a ni. An inremna ang chuan Mexico hian US-a dan loa pem lutte danna atan hian ni 45 hun a nei tih tarlan a ni a, Guatemala border-ah National Guard 6,000 a dah bawk a ni.