Gulf of Oman tanker puak: IRGC-in mine puak bang an la lai video US-in tichhuak

Gulf of Oman-ah Ningani khan tanker pahnih a puak a, pakhat zawk aṭanga Iran Revolutionary Guard Corps (IRGC) ten mine puak bang an la lai video chu US-in a tichhuak.

Ningania tanker pahnih puak kha Japanese tanker leh Norweigian tanker a ni a, IRGC-te'n mine puak bang an lakna hi Japanese tanker zawk a ni tih US official-te'n thlalak an tarlan aṭangin a lang a ni. US chuan tanker puakah khan Iran chuan mawh a phur tih a sawi a, mahse Iran chuan US puhna hi a pha thung a ni.

Video footage-ah hian Iran Revolutionary Guard-te'n Kokuka Courageous lawng aṭanga mine an la lai hi a lang a, media hrang hrangah video hi a darh nasa hle. IRGC-te hian tanker puah aṭanga darkar riat hnu velah mine hi an la a ni.

Thla hmasa khan United Arab Emirates tuipui kamah tanker pali a lo puak tawh bawk a, hetah pawh hian US chuan Iran chu mawhphurtuah a lo puh tawh bawk a, mahse finfiahna erawh a nei lo thung. Gulf of Oman-a tanker pahnih a puah leh tak avang hian oil man pawh 4%-in a pung nghal nia tarlan a ni.