Hong Kong hruaituin extradition bill titawp lailawk
Hong Kong-a cheng, thiam loh chantir tawhte mailand China-a thawn an nih theihna tur bill, extradition bill chu nasa taka dodal a nih hnuah Hong Kong leader Carrie Lam chuan Inrinni khan tiam chin awm loin a titawp.
Extradition bill hian Hong Kong-a cheng mi maktaduai 7-te leh khawpuia awm ramdang mi leh Chinese mite pawh a huam tel vek dawn a ni. He dan siam thar hi mi tam tak chuan Hong Kong inrelbawlna atana thil hlauhawm takah an ngai.
Bill duh lohna lantîr hian Pathianni hmasa (June 9) khan mi tam tak chuan Hong Kong-ah kawng an zawh a ni. Hemi hnu hian nawrh hi huaihawt chhunzawm zel a ni a, pungkhawmte hnawhdar nan hian tear gas leh rubber bullet-te hman a ni.
Inrinni khan Hong Kong Chief Executive Carrie Lam chuan news conference neiin, mipuiten an nawrna nasat avangin sorkar chuan he bill tihtawp lailawk hi a rel ta tih a sawi. Khawtlang mipui aiawh hrang hrangte kawm lehin, an ngaihdante an ngaihthlak sak leh phawt dawn tih a sawi a ni.
Hetihlai hian nawrh huaihawt zinga tam tak chuan he bill hi tihtawp lailawk mai ni lo, ṭhiah nghal vek phutin nimin thleng khan lungawi lohna an la lantir chhunzawm. Legislative councillor hlui leh activist Lee Cheuk Yan chuan tuna tihtawp lailawk ringawt chuan awmzia a nei lo a, Lam chuan a duh hun hunah a thar thawh leh thei dawn tih a sawi. Hei vang hian ṭhiah hlen a nih hma loh chu lo dodal zel a ṭul tih a sawi.