Notre-Dame donor lianten sum la pe lo

France rama cathedral hmingthang tak, Notre-Dame cathedral chu April 15 khan kangmei vangin a chung chhipzum a chim a, thil dang tihchhiat a nei nual bawk. Cathedral kang hi mi tam takin an ui a, France rama mi hausa hote chuan a din thar lehna tur hian sum tam tham tak tak an thawh tur thu pawh an puang nghal a ni. 

Mahse Notre Dame official-te sawi danin cathedral siamṭhat lehna tura sum tam tak pe tura lo insawi tawhte chuan tun thlengin sum fai engmah an la pe lo tih an sawi. A siamṭhat hna thawk­tu, catheral-a hna­thawktu 150 vel chhawr mekte hlawh chu American leh French miten Notre Dame charity foundation kaltlanga sum an pek khawm hmanga pek an ni zawk tih an sawi. 

Notre-Dame senior press official, Andre Finot chuan mi hausate hian an sum pek tur chu eng ang taka hman nge a nih dawn tih hriat hmasak an duh phawt tih sawiin, hnathawktute hlawh atana lo pek chu an duh lo nia a lan thu a sawi. 

Cathedral din thar lehna tura France rama mi hausa eng emaw zatin sum pek an tiam hi US dollar tluklehdingawn khat dawn a tling a ni. Hetihlai hian Friends of Notre-Dame de Paris president, Michel Picaud chuan donation an dawn tawh zinga 90% vel chu American donor-te hnen aṭanga an dawn tih a sawi a ni.