Israel-in President Trump hming chawia hmun siam hawng
Israel sorkar chuan a ram luah, Golan Heights-a Juda chenna tur hmun a siam thar, US President Donald Trump hming chawia 'Trump Heights' tia a vuah chu Pathianni khan a hawng.
Israel Prime Minister Benjamin Netanyahu-a chuan an hmun siam thar hi a hawng a, a hawnna hmunah hian special cabinet meeting neih nghal a ni. He hunah hian senior minister te, Golan Heights regional council official-te leh Israel-a US ambassador David Friedman te an tel.
Netanyahu-a chuan an tana ni chhinchhiah tlak tak a nih thu a sawi a, "Kum tam tak chhung kan lo tih theih tawh loh, Golan Heights-a Juda-te chenna hmun tur kan siam dawn ta a ni. He hmun hi Israel ṭhian ṭha, President Donald Trump chawimawina atana tih a ni nghal bawk a ni," tiin a sawi.
Israel PM chuan kumin March thlaa President Trump-a'n Syria rama Golan Heights neitua Israel a pawm hnuah he hmalakna hi kalpui a nih thu a sawi bawk. US ambassador Friedman-a pawhin thu sawiin, Golan Heights chu Israel ram bung pawimawh tak a ni tih a sawi. President Trump-a pawh fak nghalin, khawvel hmun dangah hetianga president nilai mek chawimawina pek hi a la awm ngai lo tih a sawi.
Israel hian 1967 Middle East War lai khan Syria lak aṭangin Golan Heights hi a laksak a,a luah zui a ni. Mahse hei hi tun thlengin President Trump tih loh ramdangten an la pawmsak lo. Golan Heights hi Syria khawpui, Damascus chhim thlanglam km 60 vela hlaa awm a ni a, km 1,000 biala zau a ni.
US President Trump chuan kum 2017 December thla khan Jerusalem chu Israel khawpuiah a lo pawm tawh bawk a, hei pawh hian sawisel a hlawh hle. Hei vang hian Israel leh Palestine-ah pawh tharum thawhna nasa tak a thlen phah hial a ni.