Hong Kong hruaitu bang turin phut

Hong Kong-a student activist lar tak, Joshu Wang chuan tan-in aṭanga chhuah a nih hnuah Hong Kong leader Carrie Lam chu bang turin a phut. 

Wong hi kum 2014-a democracy thlawptuten nawrh an huaihawt, Umbre­lla Movement tia sawi, hruaitu a ni. Hei movement a kalpui vang hian kum 2017 leh 2018 khan tang tura hrem a ni a, a tan hun zoin nimin khan tan-in aṭangin a chhuak a ni. 

Hong Kong sorkarin thiam loh chantir tawhte mainland China-a thawn theihna tur, extradition bill a siam chu mipuiten duh loin lungawi lohna an lantir a, hei vang hian Inrinni khan Carrie Lam chuan he bill hi a lo titawp lailawk a ni. Mahse hetichung hian Pathianni khan bill duh lohna lantir hian mi maktaduai hnih vel chuan lungawi lohna an la lantir chhunzawm tho a ni. 

Bill duh lo tute chuan he bill hi a taka hman a nih chuan China justice system hnuaiah mipuite dah an ni thei dawn a, an khawpuiin a hrana ro a inrelna pawh China chuan a rawn dip ral thei dawn niin an ngai. Lam hi China thlawptu lam a nih avangin a chungah mipuite an lungawi lo hle a ni.