Myanmar : Nawrh huaihawt zinga pahnih kaphlum leh Trade union-in hna thawk lo turin mipuite ngen

Myanmar sipai rorelna duh lohna lantira nawrh huaihawt zinga pahnih chu police-te silai hmehpuahin fuhin an thi. Tualchhung buaina a chhuah hnuah police leh sipaite kut tuarin mi 50 chuang an thi tawh a ni. 

February 1-a sipaiten civil sorkar thuneihna an hnehchhuh aṭang khan nitin mipuite hian sipai chet dan duh lohna leh democracy tundin leh phutin nawrh an huaihawt a ni. Nimin khan Myanmar hmarlam, Myikyina khuaa nawrh huaihawtte hnawhdarh nan police-ten  stun grenade leh tear gas-te an hmang leh a, silai tak hmehpuah a ni bawk. Pungkhawm zinga pahnih chu silai muin an luah fuhin an thi a, mi dang pathumin hliam an tuar bawk. Hetih lai hian mi ṭhenkhat chuan nawrh huaihawtna hmunah police leh sipaite an awm laiin, silai tak hi an punkhawmna bula in aṭanga hmehpuah niin an sawi a, a hmetpuaktute hi tute nge hriat an ni lo. 

Yangon, Mandalay leh khawpui hrang hrangah nawrh huaihawt chhunzawm zel a ni a, chhim lama Dawei khawpuia kawngzawhte chu police leh sipaite lakah helpawl, Karen National Union-ten an veng. Kawngzawhte veng tur hian nimin zing  Karen National Police Force unit chuan ralthuamte kengin khawpui chhung hi an lut a ni. 

Assistance Association for Political Prisoners advocacy group chuan Pathianni thleng khan sipaite hian mi 1,800 dawn an man tawh tih an sawi. National League for Democracy (NLD)  official leh local campaign manager Khin Maung Latt chu Pathianni khan police-ten an kawl laiin a thi. Maung Latt hi a lu leh taksaah hliam a tuar a, nghaisak hlum nia sawi a ni. Mahse hemi chungchangah hian a mantu, Yangon-a Pabedan district police-te chuan thuchhuah engmah an la siam lo. 

Myanmar rama trade union-te chuan nimin khan an rama democracy sorkar hnena thuneihna pek let a nih hma chuan hnathawktute chu an hna thawk chhunzawm tawh lo turin an ngen. 

Nimin khan Yangon khawpuiah chuan sipai rorelna duh lohna lantir nan dawr leh factory-te bakah bank-te khar vek an ni. Labour organisation 18-te chuan ngenna hi siamin, union leh non-union worker-te pawh ang khat veka kal turin, sipaite rorelna tihtawp a nih hma chuan an hna chawl rih turin an ngen a ni. 

Thuchhuah an siamah, "Democracy humhim tura kan chet a hun a ni. Tumahin hna thawk turin min nawr lui thei lo. Sipaite sal kan ni lo a, kan ni ngai dawn lo bawk a ni," an ti. Dan pangngai anga hna an thawh chhunzawm zel chuan a hlawkpuitu tur ber chu sipaite an ni tiin, an ram economy hrek a nih theihna turin hna thawh an chawlh a ngai tih an sawi.