Court-a inlan hnu lawkah Egypt President hlui a thi

Egypt President hlui Moha­med Morsi chu Thawhṭanni khan court-ah a inlan laiin a chau avangin a tlu a, damdawi-inah hruai nghal ni mah se an ram huna tlai dar 4:50 khan a thi. 

Kum 67 mi, Mohamed Morsi hi kum 2012-a Egypt mipuiten demcoracy kalphung anga zalen taka president thlanna an neih hmasak bera thlan tlin a ni. Mahse kum 2013 July thla khan mipuiten a kaihhruai sorkar laka lungawi lohna lantira nawrh nasa tak an huaihawt hnuah, sipai chakna hmangin a thuneihna aṭ-angin paihthlak a ni a, man zui a ni bawk. 

Morsi hi president aṭanga paihthlak a nih hnuah security force-ten nawrh huaihawtte an beihletnaah mawhphurtuah puh a ni a, thubuai eng emaw zat siamsakin heng zingah hian ram phatsantua puhna pawh a tel. A party, Muslim Brotherhood pawh sorkar thar chuan dan pawnah a hnawl nghal bawk a ni. 

President hlui hi kum 2012-a nawrh huaihawtte beihletnaa mi eng emaw zat thah an nih thubuaiah kum 20 tang tura hrem a ni a, kum ruk dawn jail-ah a tang tawh a ni. Ram phatsantua puhnaah damchhung tang tura hrem a ni bawk. Mahse kum 2016, November thla khan Court of Cassation chuan damchhung tang tura hremna pek tawh hi a sut sak. 

Kum ruk dawn tan-ina a tan chhung hian Morsi hi ṭum thum chiah a chhungten an tlawh phalsak a ni a, amahin a lawyer pawh hmuh phalsak a ni lo bawk. A hriselna a ṭha lo hle a, zunthlum nei a nih bakah a thin leh kal (kidney) pawh a ṭha lo. Hetichung hian damdawi lama enkawlna ṭha pawh a dawng lo nia sawi a ni bawk. 

Nikum khan Detention Review Panel hnuaiah British Parliament member pathum chuan Morsi enkawl a nih dan chungchangah report an lo siam tawh a, damdawi lama enkawlna ṭha pek a nih loh avangin a thih hma phah thei tih an lo sawi tawh. Morsi chu a tanna hmun­ah midang tlawh theih lohin nikhatah darkar 23 chhung hren a ni a, hei hi innghaisakna anga ngaih theih hial a ni, an ti. Court-ah a thubuai ngaih­tuahnaa a inlan pawhin Morsi hi glass soundproof bawmah dah a ni ṭhin.