Trump-an 2020 re-election campaign a Ṭan
US President Donald Trump chuan Thawhlehni khan Orlando, Florida-ah kum 2020-a US president thlanna neihna atana re-election campaign a ṭan.
President Trump chuan, "America ram ropuia siam leh kan tumna chu kan chhunzawm zel dawn a, kan siam ngei dawn a ni," a ti. A hma aia ṭha zawka siam a ni dawn tih sawiin, hei vang hian US president term hnihna tur pawh chuh leh a tum tih a sawi.
Thawhlehni-a campaign a ṭan hi official-a re-election campaign a ṭanna angah pawm ni mah se, Trump hian kum 2017, January 20-a President atana lakluh a nih hnu lawkah khan president inthlana chuh nawn leh a tum thu a sawilang nghal a, ramchhungah pawh campaign-style rally a neih chhunzawm reng a ni.
US House of Representatives-a Republican speaker hlui Newt Gingrich chuan an ram economy-in ṭhat lam a pan zel chuan Trump chu president-ah thlan tlin leh ngei a nih a rin thu a sawi.