Carrie Lam-i'n extradition bill pharh zui tum lo

Hong Kong Chief Executive Carrie Lam chuan sawisel hlawh tak, thiam loh chantir tawhte mainland China a thawn theihna tur, extradition bill chu Hong Kong hotu a nih chhung chuan pharh zui a tum lo tih a sawi. Mahse bill chu hnuhkir a nih thu erawh a sawilang lo. 

Nimina press conference a neihnaah, Lam chuan bill avanga mipuite laka lungawi lohna nasa tak a thlen chu pawi a tih thu sawiin ngaihdam a dil. "He bill vang hian hlauhthawnna leh mipuiteah ngaihdan in ang lohna tam tak a awm phah a ni. Hetianga mipuiten hlauhthawnna an neih chhung chuan thuneihna ka chan chhungin bill hi pharh zui a ni tawh lo ang," tiin a sawi. 

Kar kal ta Inrinni khan Lam hian mipuiten duh lohna an lantir avangin bill hi tihtawp lailawk a nih tur thu a lo puang tawh a, mahse hetichung hian Pathianni khan mi maktaduai hnih velin kawng zawhin bill an duh lohna hi an lantir chhunzawm tho a ni. 

Democracy thlawptu lawmaker leh activist-te chuan Lam ngaidam dilna chu an pawm lo tih an sawi a, Hong Kong hruaitu a nihna aṭanga bang nghal tur leh, bill pawh chu ṭhiat nghal vek turin an phut. An thil phut chu sorkarin a ngaihtuah loh chuan nasa zawka lungawi lohna lantir leh an tum thu an sawi.