UN-in Morsi thih dan chhui chian a phut
United Nations chuan court-a a inlan laia Egypt President hlui Mohamed Morsi thih dan chu chiang tak leh langtlang taka chhui chian a phut tih a sawi.
UN human rights office chuan Morsi thih dan chhuinaah hian kum ruk chhung zet tan-ina a tan chhunga enkawl a nih dan zawng zawngte pawh chhui tel a ni tur a ni, tiin a sawi bawk.
Cairo court-ah a inlan laiin Thawhṭanni khan Morsi hi heart attack vangin a tlu a, damdawi-inah hruai nghal ni mah se chhan theih a ni lo. Thawhlehni zing khan a vuina inkhawm hi an chhungkua in neiin phum nghal a ni.
UN human rights thupuangtu Rupert Colville chuan, "Tan-ina Morsi enkawl a nih dan te, medical treatment pek a nih dan leh a chhungte leh a lawyer-te a hmuh theih loh dante chuan ngaihven a hlawh zual hle a ni", tiin a sawi.
Morsi hi a tanna hmunah hian ni khatah darkar 23 chu midang hmuh phalsak loa khung hran nia sawi a ni a, hei bakah hian a hrisel lo hle chungin damdawia enkawlna ṭha pawh a dawng lo nia sawi a ni bawk.
Human rights pawl, Amnesty International leh Human Rights Watch-te pawhin Morsi thih dan hi chhui chian an phut thu an sawi. HRW chuan Morsi thihnaah hian Egypt sorkar chu mawhphurtuah a ngaih thu a sawi.
Middle East-a mi tam takin Morsi hi an sun a, Turkey President Recep Tayyip Erdogan chuan Morsi chu 'martar' tia sawiin, a thih dan chungchangah Egypt sorkar a dem thu a sawi.