Hong Kong-ah nawrh huaihawt thar leh

Sawi zui hlawh tak, extradition bill ṭhiat tur leh Hong Kong hotu Carrie Lam ban tura Hong Kong sorkar phutin nimin khan mi tam takin nawrh an huaihawt thar leh.

Hong Kong Chief Executive Carrie Lam chuan mipuiten extradition  bill duh lohna lantira hun eng emaw chen nawrh an huaihawt hnuah, he bill hi mipuite duhdan a nih loh chuan thuneihna a chan chhungin pharh chhunzawm a ni dawn lo tih a lo sawi tawh a ni. Mahse mipuite chuan bill hi ṭhiah nghal vek an phut thung. 

Nimina nawrh huaihawt tur hian social media kaltlangin an inhrilh darh a, an ram huna zing dar 7 vel aṭangin Legislative Council Complex pawnah mi tam tak an pungkhawm a ni. Nawrh huaihawtte hian an thil phut tihlawhtling turin sorkar chu Ningani tlai thleng khan hun an pe a, an hun pek chhunga official lam aṭanga chhanna an dawn loh avangin nawrh hi an huaihawt thar leh a ni. Pungkhawm zingah zirlai tam tak an tel a, an zinga a tam zawk chuan thawmhnaw dum an inbel. 

Pungkhawmte chuan an zalenna atana bei an nih thu an sawi a, he bill hi tihtawp lailawk ringawt lo a, ṭhiat nghal tura an phut thu an sawi.