Sri Lanka Cardinal-in thu dik zepah sorkar a puh

Sri Lanka-a Catholic kohhran hotu, cardinal Malcolm Ranjith chuan kumin Easter Sunday, April 21-a Kristian biak-in pathum leh hotel pali beih a nih chungchangah sorkar chu a dem thu sawiin, thudik zepah a puh. He pawikhawihna thleng vang hian mi 250 chuangin nunna an chan a ni. 

Islamic State firfiak pawl chuan Sri Lanka-a biak-in leh hotel beitu hi an ni tih an inchhal. Thuthar thehdarhtute a kawm­na­ah, Ranjith chuan he pawikhawih­na thlengah hian sorkar chuan a mawhphurhna tih loh tam tak a nei tih a sawi. Kohhran hotu chuan April 4 khan Indian intelligence service chuan Sri Lanka hnenah pawikhawihna thlen tum chungchang hi a hrilh hnuah ṭum thum zet phone-in a hrilh nawn leh a, pawikhawihna thlen ni zing lamah ngei pawh hrilh nawn leh an ni tih a sawi. 

Ranjith chuan, "Mahse tuman he thil hi an ngai thutak duh lo a ni. Biak-in beih tumna a awm nia sawi hi lo hre ve ni ila chuan biak-in te kan khar ang a, mipuite pawh in lama haw tura hrilhin hetiang pawikhawihna rapthlak tak thleng tur hi kan dang thei ngei ang," a ti. 

Pawikhawihna a thlen hnuah puhmawh tur zawngin an indem kual a, thudik tak pawh thup an tum a ni, tiin Cardinal chuan a sawi.