Pak President hluiin man tawh lo turin ti

Pakistan President hlui Asif Ali Zardari chuan sorkar hnenah amah chu man tawh lo turin a ti a, mipuite rilruah hlauhthawnna an tuh sak mai mai zawk dawn tih a sawi. 

Eiruk thubuai avanga man a nih hnuah a vawi khatna atan Ningani khan Zardari hi Parliament-ah a inlan a ni. Anti-corruption body National Accountability Bureau (NAB) kutah a awm mek a, National Assembly Secretariat-in Parliament session-a a tel phalsakna thupek a tichhuah hnuah house-ah hian a inlan. 

Kum 63 mi, eptu pawl Pakistan People's Party co-chairman leh Pakistan prime minister hlui Benazir Bhutto pasal, Zardari hi kar hmasa khan sum tam tham tak tihchingpen thubuaiah NAB chuan a chenna inah a man a, Islamabad High Court-ah bail-a chhuah dil mah se court chuan a dilna hi a hnawlsak a ni. 

Zardari chuan jail-a tantir a nih chuan eng danglamna mah a thlen loh tur thu a sawi a, an party a tih chak phah zawk dawn a ni, a ti. Mahse hei hian ram mipuite rilruah hlauhthawnna a siamsak dawn a, Zardari pawh man a nih chuan anni pawh man theih ve reng an ni, tih zawngin an ngaihtuah phah dawn a ni, a ti.