Myanmar : Police-ten nawrh huaihawtte dang bet

Myanmar sipai rorelna duh lohna lantira Yangon khawpuia Sanchaung district-a nawrh huaihawtte chu security force-ten Thawhṭanni zankhuaa an awmna hmun chhuahsan thei loa an dan beh hnuah, nimin zing khan an kal chhuak thei ta. 

Sanchaung district-ah nawrh huaihawt zinga mi 200 vel chu Thawhṭanni khan security force-te chuan an awmna hmun chhuahsan thei loin an dang bet a ni. Khawthlang ramten an mi dan behte hi chhuah tir turin an nawr hlawm a, Myanmar-a US embassy pawhin heng mite hi him taka an in lama haw phalsak turin a nawr bawk. Hemi hnu nimin zing dar 5 vel khan security force-te chu kalsawnin, an mi dan behte ho pawh an kalsawn ve thei ta a ni. 

United Nations (UN) hotu Antonio Guterres chuan Thawhṭannia dan beh zingah hian International Women's Day denchhena kawngzawh, hmeichhia eng emaw zat an tel tih a sawi. Sipaite hnenah an mi dan behte hi him taka chhuah tir vek turin a lo ngen tawh a ni. 

Sipaite hian Thawhṭanni khan Sanchaung district-ah hian silai leh stun grendate-te kapin, district pawn lam mi an awm leh loh zawngin in an dap kual a, lo thukru leh lo hum tum manchhuahte chu na taka hrem an nih tur thute an puang. In an dap kualnaah hian mi 20 vel an man niin tualchhung news service chuan a tarlang. 

Ram chhunga sipaite duh lohna nawrh huaihawt chung chang chhuah ṭhintu, local news outlet - Mizzima, DVB, Khit Thit Media, Myanmar Now leh 7Day News-te licence chu sipai sorkar chuan Thawhṭanni khan a titawp sak bawk. 

Sipaite hian Yangon-a Myan­­mar New news agency office chu dapin, computer leh hman­raw dangte an mansak bawk tih Mizzima news website chuan a tarlang. Mizzima chuan thuchhuah siamin, independent media an nih angin sipaite chet dan duh lohna leh, democracy tundin a nih leh theihna turin an bei chhunzawm zel dawn tih a sawi a, an website, Facebook page, Youtube leh social media channel-te chu en chhunzawm zel turin mipuite an chah. 

Human Rights Watch (HRW) deputy Asian director, Phil Robertson chuan sipaite chetdan chu freedom of press palzutna nasa tak, journalist-te an hna thawk thei loa siam tumna a ni, a ti. 

Thawhṭanni tlai khan Kamayut Media dintu leh a thawhpui pakhat chu Yangon-ah man an ni. Kamayut Media hian nawrh huaihawtna kawnga hruaitu, democracy activist Min Ko Naing. thusawi an tichhuak thin a ni. 

Human rights group-te chuan police-te kutaa awm laia thi, National League for Democracy (NLD) official Khin Maung Latt thih dan chhui chian an phut tih nimin khan an sawi. 

Khin Maung Latt chu Pathianni khan police-ten an kawl laiin a thi a, a taksaah hliam eng emaw zat a tuar a, hei vang hian nghaisak hlum nia rin a ni. HRW Asia director, Brad Adams chuan thuchhuah siamin, Latt thih dan chu chiang taka chhui tura sipaite ngenin, he thila mawphurtute pawh hremna pe ngei turin a phut tih a sawi. 

Adams chuan sipai sorkar chu March 7-a security force-ten kut an thlak hnua an lak bo nia sawiin, NLD  member pakhat pa, U Peter chu chhuah turin a ngen bawk.