'Muslim ban' vanga visa dilna hnawlte US-in visa an dil ṭhat a phalsak

US president hlui, Donald Trump-a'n Muslim tamna ram 13 aṭanga an ram a luh khapna thupek a siam avanga heng ram aṭanga US visa dilna lo hnawlsak tawhte chuan a tharin visa hi an dil nawn leh thei tih US Department of state chuan a sawi.

President hlui Trump-a'n Muslim ram aṭanga luh khapna thupek a lo siam tawh hi President thar, Joe Biden chuan office a luah ṭan ni, January 20 khan a sut nghal a ni. US Department of State thu­puangtu, Ned Price chuan January 20, 2020 hma lama visa dilna lo hnawlsak tawhte chuan application fee a thara chawi lehin, an dil nawn leh theih thu a sawi. Kum 2020, January 20 hnu lama dilna hnawlsakte erawh chuan additional fee pek a ngai lo a, application pawh thehlut kher tawh loin an lo dil tawhna chu ngaihtuah ṭhat sak turin an ngen leh thei ang. 

Kum 2017, December thla aṭang khan Muslim tamna ram aṭanga luh khapna thupek a siam hnuah, mi 40,000 te visa dilna chu hnawlsak a lo ni tawh a ni. Trump-a President chhung khan Muslim ram khapna siama telh ramte hi tihdanglam niin, a term tawp thlenga khapna siamah hian Myanmar, Eritrea, Iran, Kyrgyzstan, Libya, Nigeria, North Korea, Somalia, Sudan, Syria, Tanzania, Venezuela leh Yemen ramte a huam.