Pakistan PM-in fiahna a paltlang
Pakistan prime minister Imran Khan chuan an ram Parliament, National Assembly-ah fiahna a paltlang a, hun rei tak tualchhung politics buaina awm pawh a reh theih tawh beisei a ni.
Sorkar fiahna nei tur hian President thupek angin Parliament lower house, member 342 awmnaah special session neih a ni. Imran Khan hian simple majority nei turin vote 172 a hmuh phak a ngaih laiin vote 178 a hmu pha.
National Assembly-a sorkar fiahna hi eptu party 11 ṭangrual, Pakistan Democratic Movement (PDM) chuan an boycott a, hei vang hian PM tan pawh fiahna paltlang hi a awlsam phah ta a ni.
Fiahna an paltlang hnuah foreign minister Shah Mahmood Qureshi chuan single-point resolution a pharh zui a, he resolution-ah hian House-in prime minister Imran Khan chungah an ram hruai tura rinna a nghah ngam thu tarlan a ni.
Kar liam ta Nilaini-a Senate inthlanah a finance minister ṭanglai Abdul Hafeez Shaikh chuan prime minister hlui Yusuf Raza Gilani a hneh zo lo a, hei vang hian eptute chuan Prime Minister hi bang turin an phut zui a ni. PM chuan eptute nawrna avangin a kaihhruai sorkar fiahna hi lower house-ah neih turin a ti ta a, fiahna hi a paltlang zui ta a ni.
Pakistan-ah hian Pakistan Tehreek-e-Insaf (PTI) kaihhruai ṭangrual sorkar hian an member pakhat a ban hnuah member 181 a nei mek a, heti lai hian eptu ṭangrual pawl hian member 160 an nei thung. Ṭangual sorkarah hian PTI bakah Muttahida Qaumi Movement (MQM), Pakistan Muslim League-Q (PML-Q), Balochistan Awami Party (BAP), Grand Democratic Alliance (GDA) te an tel.