US-in Iran hrekna lian a siam dawn : Trump
US President Donald Trump chuan vawiin aṭang hian US-in Iran hrekna lian a siam belh dawn tih kar kal ta Inrinni khan a sawi.
President Trump chuan a twitter-ah, "Thawhṭanni aṭangin Iran hrekna lian dang siam a ni leh dawn a ni," a ti a, mahse eng ang hrekna nge ni dawn tih erawh a sawilang tel lo. "Iran chuan nuclear ralthuam a nei tur a ni lo," tiin a tarlang tel bawk.
Iran Revolutionary Guard-ten kar kal taa an rama thlawk lut nia sawi US drone an kahthlak sak hnuah, President Trump-a hian sipai hmanga Iran beihna tur thupek a siam hman a, mahse a hnuah a sut leh a ni. Hemi rual hian Iran nena an buaina chu chinfel a nih loh chuan sipai chakna chu hman theih reng a la ni tih a sawi.
Trump-a chuan Iran hrekna siam belh a nih tur thu a sawi rualin, Iran chuan nuclear weapon program a titawp a nih chuan ram hausa tak an ni dawn a, an hlim zawk dawn bawk a, amah ngei pawh Iran ram tan ṭhianṭha ber a ni ang, tiin a sawi. He a beiseina ang hi a thlen ngei pawh a duh hle tih a sawi nghal bawk.
Iran sipaite chuan US vauna hi chhangin, Iran lakah sipai chakna hman a nih chuan na taka chhan let a nih tur thu leh, US pawhin a tuar nasat hle tur thu a sawi ve bawk. Iran hian CIA tana enthlatu nia puha thiam loh chantir tawh, Defence ministry staff hlui Jalal Hajizavar chu kar kal ta khan Tehran-a a tanna hmunah a khaihlum. Hajizavar khaihlum a nih thu hi Inrinni khan sawichhuah a ni chauh. Hajizavar hian CIA tana enthlak hna thawkin, an hnen aṭang hian sum pawh a dawng nia puha ni.
Thuneituten a chenna in an dapnaah enthlak hna thawhna atana a hman, hmanrua te pawh an man a ni. Court chuan Hajizavar nupui hi kum 15 tang turin a hrem bawk.