UNCHR hotuin Venezuela eptu pawlte chhuah turin a ngen
United Nations Commissioner for Human Rights Michelle Bachelet chuan Venezuala sorkar hnenah eptu pawl an mante chu chhuah turin a ngen a, Venezuela ram chuan humanitarian lamah dinhmun ṭha lo tak a tawng chho mek a ni, a ti.
Michelle Bachelet hi Venezuala President Nicolas Maduro sawmna angin kar kal ta kartawp lam khan ni thum cham turin a zin. Nicolas Maduro hi politics lama a hmelmate lakah beihpui thlak a, mi eng emaw zat manah puh a ni.
"Thuneitute hnenah chuan boruak muanawm tak hnuaia an dikna chanvo lantira nawrh huaihawt vanga mante chhuah vek turin ka ngen a ni," tiin Bachelet chuan a sawi. UN rights hotu hian eptu pawl jail-a tang mek chhungte ṭhenkhat pawh a hmu bawk.
Rights group-te chuan Bachelet hnenah hian Venezuela sorkarin politics kaihhnawih thil avanga mi 715 a mante chung chang chu a zin hunah hian sawichhuak ngei turin an lo nawr tawh a ni. Mahse he puhna hi Maduro kaihhruai sorkar chuan a pha thung.
Maduro chuan Chile president hlui, Bachelet ngenna chu a ngaihtuah zui tur thu a sawi. Bachelet hnenah chuan a rawtna siamte chu a ngaih pawimawh tur thu leh, amah pawh ring ngam tura a hrilh thu a sawi. Venezuela hian economic leh politics lamah harsatna a tawk meka, sorkar service chhiat vang leh, ei leh in lama indaih lohna nasa tak a thlen mek avangin kum 2015 aṭang khan mi maktaduai li vel chu ram dangah an tlanchhe tawh a ni.