Palestinian refugee tan Dollar tld 1.2 tuak chhuah tum

United Nations Relief and Works Agency for Palestine Refugees (UNRWA) chuan kumin chhungin Middle East-a an hnathawhna turin US dollar tluklehdingawn 1.2 tuak chhuah an tum. 

UNRWA Commissio­ner General Pierre Kra­henbuhl chuan nikum chhung khan hna­thawh­na atan hian dollar tluklehdingawn 1.2 hi an hman thu sawiin, kuminah pawh hetiang zat hi hmuh leh an tum tih a sawi. Donor-ten an pek ṭhat a, kum 2018-a an pek ang kha an pek chhunzawm leh theih chuan UNRWA chuan a sum mamawh ang chu a hmu leh thei dawn a ni, a ti. 

Krahenbuhl chuan kumin thla nga chhung chu UNRWA chuan a chanpual ang chu ṭha taka a thawh theih thu a sawi a, mahse June thla aṭangin UNRWA hian sum lamah indaih lohna a tawng chho ṭan tih a sawi. UNRWA hian Pales­tinian naupangte tan school 700 a enkawl mek a, health centre 140 a siam bawk. Gaza Strip-a cheng, Palestinian mi maktaduai khat vel chu ei tur an sem bawk ṭhin. 

Kum 1949-a din, UNRWA hi Jordan, Syria, Lebanon, West Bank leh Gaza Strip-a Palestinian refugee mi maktaduai 5.4 velte ṭanpui hna thawk tura din a ni.