Covid-19 kai maktaduai khat chuang awm tawh
Khawvel pumah Covid-19 kai mi maktaduai khat chuang an awm tawh a, he hri vanga thihna thlen tamna ber, Italy ramah chuan 14,000 dawnin an thihpui tawh bawk.
Covid-19 kai hi US-ah an tam ber tawh a, mi nuai 2.3 chuangin an kai tawh bawk a ni. Italy dawtah Spain chu hri vanga thi an tamna ram niin, mi sing chuangin an thihpui tawh bawk a ni.
China-in Covid-19 vanga thite sunna ni hmang dawn
Chinese State Council chuan vawiin hi an ram pumah Covid-19 vanga thi te sunna ni atan an hmang dawn tih a sawi.
Thuchhuah an siamah, "State Council chuan April 4 hi kan rama hri leng vanga nunna chante leh, he hri do letna tura an thawhna kawnga nunna hlantute sunna leh hriatrengna atana hman tura a rel a ni," a ti.
China hi Covid-19 darh ṭanna ram ni mah se, hri kai zat an tlahniam tawh hle. Ram chhung aṭanga hri inkai hi an awm tawh mang lo a, mahse ram pawn aṭanga lut aṭangin a kai hi an la awm reng thung. Nimin khan ram pawn aṭanga lut mi 29-te chuan hri an kai tih hriat a ni a, ram chhung aṭanga kai mi pahnih an awm bawk. Ningani khan hri vanga thi an ram pumah mi pali an awm.
Japan-in na zualte chauh damdawi-inah dah turin ti
Japan sorkar chuan hri kai an pun chhoh zel avangin damdawi-in khumte chu an zinga na zualte dah turin bial hrang hrang thuneitute a hrilh. He hri kai, an dinhmun ziaawm zawkte chu inah emaw, hotel-ah emaw in enkawl turin a ti.
Japan-ah hian hri kai hriatte chu an dinhmun ngaihtuahawm vak lo pawh damdawi-inah dah luh vek an ni a, mahse damlo an pun chhoh zel avang leh, damdawi-in khumte a khah chak tak em avangin he ruahmanna thar hi an siam ta a ni.
Hetih lai hian hri leng avang hian sorkar chuan state of emergency a la puang lo a, prime minister Shinzo Abe chu emergency puang tura nawrna a na tawh hle. Japan ramah hian hri kai hi 3,000 dawn an awm tawh a, heng zinga mi 684 chu an ram khawpui Tokyo mi an ni. Mi 73 in an thihpui tawh bawk.
Brazil President a ṭanhmun ngaiah la ding
Hri darh zel tur venna atana inkhunghran kalpui sawiseltu, Brazil president Jair Bolsonaro chu a ṭanhmun ngaiah la ṭangin, an rama sumdawnna hmunte hawn chhunzawm zel tura a tih chu thil ṭul a nih thu a sawi nawn leh.
Ningani-a Joven Pan radio-in a kawmnaah, president Bolsonaro chuan hri darh tur venna atana inkhunghran leh social distancing a pawimawh thu sawitu, health minister Luiz Henrique Mandetta chu sawiselin, minister hi Brazil-in hun harsa a tawh meka hruai turin a tlak lo a ni, a ti.
Health Minister nen chuan ngaihdan in ang lo tak tak an nei tih a sawi a, mahse hri leng dona kawnga hma an lak mek laiin minister a nihna aṭanga ban erawh chu a tum loh thu a sawi. President hian Brazil-a state 27 zinga a tam zawkin hri darh tur venna atan inkhunghranna dan kalpui a; dawr, bar leh biak-inte an khar chu a sawisel nawn leh. Kar leh Thawhṭanni aṭang chuan hnathawhna hmunte hawng a, mipuite chu an hna thawhna hmun lama kir turin a ngen.
Singapore thla khat shut down dawn
Singapore prime minister Lee Hsien Loong chuan hri darh zel tur venna atan khar leh Thawhlehni aṭangin an ram chu thla khat chhung shut down a ni dawn tih a sawi. Hemi chhung hian essential service leh economic sector tih loh chu khar vek a ni ang.
PM chuan ei tur leh mamawh dangah thlaphan tur a awm lo tih mipuite chahin, an mamawh tawk chauh lei a, an mamawh tur bak an neihte chu midangte pe zawk turin a ngen. Chiai lo a, inlungrual taka hri dona kawnga thawkho turin mipuite a ngen a ni.