Mt Everest-ah Bawlhhlawh a tam

Khawvela tlang sang ber, Mount Everest lawnchhuah tuma kal chu an pung zel a, hetihlai hian tlang lawn miten an hnutchhiah, puan in leh bawlhhlawh dang pawh a tam hle. 

Nepal sorkar chuan Everest tlanga bawlhhlawh hnutchhiahte thenfai hna hi a thawk mek a ni. Budget expedition company-te chuan tlang lawn mite chu mi pakhatah dollar 30,000 zel a chawitir a, hei hian an bawlhhlawh hnutchhiah tihralna tur pawh a huam tel. Mahse kuminah hian tlang lawn an tam a, mi 700 vel anga chhut an ni. Hei vang hian bawlhhlawh a tam a, an bawlhhlawh hnutchhiah zingah hian tlang lawnten sign post atana an hman oxygen cylinder ruak te, ei tur funna te leh hruite pawh a tel a ni. 

Everest-a campsite sang ber, South Col or Camp 4-ah chuan puan in kalsan a tam hle a, hengte hi thliin a len darh bawk avangin puan in hlui leh bawlhhlawhte a darh nasa hle. Camp 4 hi meter 8,000 a sanga awm a ni. Sorkarin tlanga bawlhhlawh thenfai hna thawk tura a chhawr, sherpa-te chuan tlang a san tawh avang te, oxygen level a hniam vang leh a nal bawk avangin South Col a bawlhhlawh thenfai hna chu a harsa hle tih an sawi a, vurin a khang hnan puan in hlui pakhat lachhuak tur pawhin hun an duh rei thei hle tih an sawi. Thawktu zinga mi Dawa Steven Sherpa chuan kum 2008 aṭang khan amah chauhin bawlhhlawh a lakchhuah pawh hi kg 20,000 zet a tling tawh tih a sawi. Sherpa chuan kumin bikah pawh South Col-a puan in hnutchhiah hi 30 vel a tling tih a sawi bawk.