Myanmar sorkarin Rakhine state-ah internet service titawp

Myanmar sorkar chuan sipaite leh inlakhran duhtu hel pawlte inbeihna a thlen vangin Rakhine state-ah mobile internet service a titawp. 

Kar kal ta Zirtawpni aṭanga khan state chhung khaw lian pakuaah internet hi tihtawp a ni. SMS leh mobile phone call erawh hman chhunzawm theih a ni thung. Amnesty International researcher on Myanmar Laura Haigh chuan internet service tihtawpna hmun hi journalist leh humanitarian worker-te khuahkhirhna hmun a nih avangin ngaihtuah zui ngai tak a nih thu a sawi. Myanmar-a telecom company inbun pathum zinga pakhat, Norway company Telenor Myanmar pawhin hun harsa leh buaina a thlen lai hian chhawmdawl hna thawhna kawngah telecom service hi a ṭangkai avangin hetianga internet service tihtawp a nihna chhan hi sawichiang turin a ngen. 

Kar kal ta Inrinni khan Rakhine state tana inrelbawlna hran leh thuneihna sang zawk pek phuta hel, Arakan Army chuan state khawpui, Sittwe hmar lama Myanmar Navy lawng lian ding chu an bei a ni. AA thupuangtu chuan Navy lawng an beih chhan chu he lawng hian Minbya, Mrauk U, Kyauktaw, Rathedaung leh Buthidaung-a hel nena inbei mek, sipaite hmanrua a pek vang tih a sawi. Rakhine state-ah hian kumin chhungin tualchhunga inbeihna thleng vang hian civil mi 50 chuang an thi tawh a, mi 400 in hliam an tuar tawh bawk.