Indonesia-ah magnitude 7.3-a nain lir a nghing

Indonesia khawchhak lamah nimin khan magnitude 7.3-a nain lir a nghing a, mahse thil tihchhiat liantham a nei lo nia hriat a ni a, tsunami warning pawh tihchhuah a ni lo bawk. 

US Geological Suvery-in a tarlan danin, lirnghing inṭanna hi Ambon island chhim lam lei hnuai km 208-a thuk a ni. A inṭanna hi a thuk avangin tsunami a thlen a hlauhthawnawm lo tih Pacific Tsunami Warning Centre chuan a sawi. Hemi hma lawk hian Papua-ah pawh magnitude 6.1-a nain lir a nghing bawk. 

Indonesia ram hi Pacific Ring of Fire-a awm a nih avangin lir a nghing fo a, nikum khan Sulawesi island-a Palu-ah magnitude 7.5-in a nghing a, tsunami thleng zui bawkin mi 2,200 chuang an thi a, chin hriat lohin mi tam tak an awm bawk. 

Kum 2004 December 26 khan Aceh province-ah magnitude 9.1-a nain lir a nghing a, tsunami na tak thleng zuiin mi 1,70,000 chuang an thi a ni.