NPP media secretary thar atan Jarpum ruat

Kumin Arunachal Pradesh assembly inthlana National People's Party (NPP) ticket-a ding, Jarpum Gamlin chu NPP National Secretary incharge for media, social media and communications atan ruat a ni.

NPP national president Conrad K Sangma chuan Pathianni khan Jarpum mawhphurhna tur hi a puangchhuak a, mawh­phurhna dang chelh turte pawh a puang nghal bawk. Jarpum Gamlin hi media lama tawnhriat ngah tawh tak a ni a, Aru­nachal-a hmunpui nei Eastern Sentinel-ah Editor leh Publisher ni ṭhin a ni a, media field-ah kum 20 chuang zet a thawk tawh a ni.

NPP chief leh Megha­laya chief minister ni bawk Conrad Sangma chuan, thu inhriattirna kawngah communication chu thil pawimawh tak a nih thu leh Gamlin chu hemi kawnga tawnhriat ngah tawh tak a nih thu a sawi. Media leh Communication chu a hrechiang hle a ni, a ti.

Hetihlai hian Aruna­chal-a in candidate tho Paknga Bage chu National Secretary incharge of Nagaland atan ruat a ni bawk. Sangma chuan NPP chu national party an nih tawh avangin, hmarchhak hmun hrang hrangah an party chu an thuam chak mek zel tih a sawi. An party chuan hmarchhak bakah hmarchhak pawn lamah pawh huang an zauh zel theihna turin hma an la mek tih a sawi bawk.