World Bank-in Covid-19 beih let nan USD tld 12 thawh

Khawvel ram hrang hranga Cono­ravirus (Covid 19) a darh chhoh mek chu ven leh thunun a nih theih nan World Bank chuan US dollar tluklehdingawn 12 a thawh.

WB-in pawisa a thawh hi he hri darhna ramte tana tih a ni a, Covid 19 dona kawnga a ṭul ang anga hman tura ruahman a ni bawk. Tunah hian khawvel ram hrang hrang 80 dawnah he hri hi a darh tawh a ni. 

"Engtin nge he hri hi khawvelah a darh chhoh zel dawn chu sawi thiam a har khawp mai, mahse he hri hi ven emaw thunun emaw a nih theih nan WB chuan pawisa a la thawh belh a ngaih hmel a ni," tiin World Bank president David Malpass chuan WB-in pawisa a thawh chungchang a sawi.

Hri venna tura WB-in sum a  thawh aṭanga a chanve dawn chu International Finance Corporation (bank) aṭangin pek a ni a, US dollar tld 4 an thawh a ni. An ni hian private sector an thawhpui bawk. 

World Health Organization (WHO) chuan Covid-19 vanga thi zingah hian kum upa lam an tam thu a tarlang. A bikin  kum 60 chung lam an tam bakah, natna lo nei sa ten he natna hi an thih pui awlsam bik thu a tarlang bawk.

Khawvel pumah he hri kai hi mi 93,210 an awm tawh a, heng zinga mi 80,000 chuang chu China ramah a ni. He hri vanga thi hi mi 3,203 an tling tawh a, a tam zawk hi China-a thi an ni bawk. He natna kai damchhuak leh hi mi 51,005 an awm tawh bawk a ni. 

Covid-19 kai zinga 83% te chu ngaihtuahawm an ni lo a, 17% te erawh chu an dinhmun a hlauhthawnawm nia sawi a ni thung. 

China chuan Covid-19 vei, na zualte enkawlna turin Roche Holding AG arthritis damdawi a hmang dawn. National Health Commission chuan he hri kai zinga a na zualte enkawlna tur hian Swiss pharma siam, Tocilizumab (Actemra) chu chawh theih a nih thu a sawi. Hetih lai hian  China National Medical Product Administration chuan coronavirus veite enkawlna tura Actemra hmanna tur hian pawmpuina a la pe lo thung. Roche firm hian Thawhṭanni khan Actemra hi a ṭul dan anga hman turin yuan maktaduai 14 man hu chu a lo thawh tawh a ni. 

Iran chuan an rama jail tang mi 54,000-te chu enfiah an nih hnuah hun rei lote chhung atan a chhuah.

Jail tangte chhuah an nih chhan hi mipui punkhawmnaa he hri hi a darh lohna tura tih a ni. Jail tang chhuahte hi  hri leng hi an kai em tih enfiah vek an nih hnua chhuah an nih thu Judiciary thupuangtu Gholamhossein Esmaili chuan a sawi. Iran-ah hian kar hnih chhungin Covid-19 hri vanga thi hi mi 92 an tling der tawh a, he hri kai hi mi 2,822 an awm tawh bawk a ni.