Trump-a'n Iran hrekna a siamah Supreme Leader huam tel
US President Donald Trump chuan Iran hrekna thar a siam a, hrekna siam thar hian Iran Supreme Leader Ayatollah Ali Khameinei pawh a huam tel a ni.
Iran-in kar kal taa US surveillance drone an kahthlak sak avangin hrekna thar hi siam a ni. May thla khan US chuan Iran oil leitute chu Iran aṭanga an oil lakluhte titawp vek turin a lo hriattir tawh a, hei vang hian ram pahnih inkar boruak hi a chhe zual hle a ni.
Iran ram hrekna thar siam hian US thuneihna hnuaia supreme leader leh sipai hotute sum lama hrekna a telh a ni a; Trump chuan Iran sorkar chet danah supreme leader leh a thawhpui hnai takte chu mawhphurtuah a puh tih a sawi.
Supreme Leader hrekna hi siam tel ni mah se hei hian nghawng a neih vak rin a ni lo thung. Ayatollah Ali Khameinei hian kum 1989-a Iran president a nih aṭangin Iran ram hi ala chhuahsan lo a, Iran ram a chhuahsan hnuhnung ber chu kum 1989 April thlaa China a tlawh kha a ni.
US hian Iran Foreign Minister Mohammad Javad Zarif hrekna pawh tunkar hian a la siam dawn nia sawi a ni. UN-a Iran ambassador Majid Takht Ravanchi chuan US thiltih dan chuan international law and order a zah tawh loh zia a tilang a ni, a ti.