UN expert-in Myanmar mobile service tihtawp a sawisel

Myanmar-a sipaite leh helpawl inbeihna thleng vanga sorkarin Rakhine leh Chin state hmun ṭhenkhata mobile internet service a titawp chu UN special rapporteur Yanghee Lee chuan a sawisel a, sipaite chuan civil mite dikna chanvo chu nasa tak an palzutsak a hlauhthawn thu a sawi. 

UN Human Rights Council hnena Myanmar human rights dinhmun a report-naah, Lee chuan khawpui pakua huamchhung chu media lam pawhin an biakpawh theih loin an awm a, chhawmdawl hna thawktute pawh khuahkhirh an nih thu a sawi. "Civil mite tan ka hlauhthawn pui hle a ni," tiin thuchhuah a siam.

Lee chuan Myanmar sipaite chuan 'clearance operation' an nei  mek nia an hrilh thu sawiin, hei hi civil mite dikna chanvo an palzut sak thupna mai a ni thei tih a sawi. Myanmar sipaite hian June 19 khan Rakhine state-a Minbya Township chu helicopter hmangin an bei a, a tukah Arakan Army helpawlte chuan Sittwe-a navy lawng chu beiin sipai eng emaw an that zui ve leh bawk. Sipai leh helpawlte inbeihnaah hian thi an awm nual tih UN human rights hotu Michelle Bachelet chuan a lo sawi tawh a ni. 

Myanmar hian kar kal ta Zirtawpni aṭanga khan state chhung khaw lian pakuaah internet hi a titawp a, SMS leh mobile phone call erawh hman chhunzawm theih a ni thung.