Sri Lanka Defence Secretary hlui thubuai siamsak

Sri Lanka Defence Secretary hlui Hemasiri Fernando chu kumin April 21, Easter Sunday nia biak-in pathum leh hotel pathum beih a nih chungchangah a hna thawk ṭha loa puhin thubuai siamsak a ni dawn. 

Easter Sunday-a pawi­khawihna a thlen lai khan Fernando hi Defence Secretary a ni a, mahse he pawi­khawih­na a thlen hnu hian a hna aṭangin a bang a ni. Attorney General Dappula de Livera chuan Sri Lanka acting police chief hnena lehkha a thawnah, pawikhawihna thleng chungchang chhuinaah Fernando hian a hna a thawk ṭha tawk lo tih hmuh a nih thu a sawi. He pawikhawihna thleng a lo dan theih loh leh, a lo tihnep theih loh chungchangah chhui chian a ni dawn tih a sawi. 

President Maithripala Siri­sena chuan police hotu Pujith Jayasundara chu a hna aṭang­in a lo suspend tawh bawk. Jayasundara leh Fernando te hi paliamentary inquiry commission hmaah thu zawhfiah turin koh an lo ni tawh bawk a, an pahnih hian an ram himna ngaihtuah kawngah President Sirisena chu dan anga thil kalpui tawk loha an puh a ni. 

Kar hmasa khan Attorney General chuan police officer pathumte chu bomb tihpuah hmaa warning pek an ni chunga hma an lak ṭhat loh avangin chhui chiang turin a lo ti tawh bawk. Easter Sunday-a pawi­khawihna thleng vanga Presi­dent Sirisena-a'n ram puma emergency a puan chu kar kal ta kartawp khan thla khat chhung atan pawhsei chhunzawm leh a ni bawk. President chuan emergency pawhsei leh chu mipuite himna atan te, dan leh thupek kenkawhna atan leh mipuite mamawh pekna kawngah hman chhunzawm leh a ngai tih a sawi. Emergency rules hnuaiah hian sipaite chuan court thupek hmu kher loin pawikhawihnaa inhnamhnawihte man leh thu zawhfiah theihna pek an ni. 

April 21-a pawikhawihna thleng kaihhnawihah hian police leh sipaite chuan rinhlelh thilah mi 100 chuang an man tawh bawk. Easter sunday-a Sri Lanka-a bomb puakah khan mi 250 chuang an thi a, hliam tam tak an awm bawk a ni.